ASOCIACIÓN DE EMPRESARIOS GROVENSES DE BENS E SERVIZOS

Emgrobes desenvolverá, durante a Festa do Marisco, diversas actividades para promover o comercio e a economía local. A primeira será a tradicional feira de oportunidades Grovestock F.M., que comezará o venres 2 de outubro e contará coa participación de 14 establecementos locais. Na carpa instalada para a ocasión ofreceranse produtos de roupa, calzado, complementos, artesanía, xoguetes, xoiería e agasallos, entre outros, con descontos e prezos especiais. A feira estará aberta de 11:00 a 22:00 horas e repetirase durante o segundo fin de semana, coincidindo co festivo do Pilar, como parte dun proxecto subvencionado pola Xunta de Galicia para apoiar o comercio local e facilitar a saída do stock sobrante.

Ademais, Emgrobes celebrará por décimo oitavo ano consecutivo as xornadas gastronómicas A Cociña do Mar, dedicadas a poñer en valor produtos mariños menos habituais nos fogóns. A actividade terá lugar o xoves 8 de outubro, ás 18:00 horas, no Mirador da Lonxa da Confraría de Pescadores, con protagonismo para a escupiña ou carneiro, o muxo e a volandeira. Participarán varios cociñeiros locais e a recoñecida Rocío Garrido, nun showcooking presentado por Ignacio Balboa no que se elaborarán receitas acompañadas de viños D.O. Rías Baixas. A entrada será gratuíta ata completar o aforo de 80 persoas. Estas iniciativas completaranse nos meses de novembro e decembro coas Xornadas e Festa da Centola do Grove e coa campaña de Nadal.